Omtale
Oskespreiing vil seie at oska frå den avlidne blir spreidd for vinden. Dette vil for eksempel vere eit alternativ for dei som ikkje ønskjer gravferd/urnenedsetjing på ein kristen kyrkjegard, eller dersom den avlidne hadde ei spesiell tilknytting til ein bestemt stad. Ved oskespreiing kan det ikkje krevjast kyrkjeleg medverknad.
Kriterium/vilkår
Oskespreiing kan skje dersom den avlidne sjølv fekk innvilga søknad om oskespreiing, eller dersom det i ettertid godtgjerast at den avlidne ønskte oskespreiing. Tillating kan òg bli gjeve for avlidne born dersom foreldra ønskjer det. Det er ingen konkrete vilkår for når og kor oskespreiing kan skje, men det er gjeve visse retningsliner som Fylkesmannen må halde seg til når ein søknad blir vurdert. Desse retningslinene går m.a. ut på at oskespreiing som hovuderegel berre kan tillatast på ope hav og i høgfjellet, og at det ikkje kan skje nær busetnad eller der folk elles oppheld seg. Fylkesmannen kan setje fleire vilkår for tillatinga.